येरवडा-कळस-धानोरी क्षेत्रीय कार्यालयात सफाई कामगारांकडून क्लार्कची कामे – प्रशासनातील गैरव्यवस्थेचा मुद्दा उघड!
पुणे :
येरवडा, कळस आणि धानोरी क्षेत्रीय कार्यालयामध्ये मोठ्या प्रमाणात सफाई कामगारांकडून क्लार्क (लिपिक) पदाची कामे करून घेतली जात असल्याची गंभीर बाब समोर आली आहे. हा प्रकार प्रशासनातील गैरव्यवस्था, पदनिहाय जबाबदाऱ्यांचे उल्लंघन आणि कामगार वर्गाचा गैरवापर असल्याचे स्थानिक नागरिकांनी निदर्शनास आणून दिले आहे.
सदर कार्यालयात नियमित सफाई कर्मचारी असूनही, त्यांच्याकडून कार्यालयीन लेखन, फाइल हाताळणी, उपस्थिती नोंदी, व इतर लिपिकीय कामे करून घेतली जात असल्याचे समजते. या कर्मचाऱ्यांना लिपिक पदाचे प्रशिक्षण, पात्रता किंवा वेतन लाभ नाहीत, तरीसुद्धा वरिष्ठ अधिकाऱ्यांच्या आदेशानुसार त्यांना हे काम करावे लागते.
नागरिक आणि काही लहुजी शक्ती सेना अध्यक्ष शुभम वाघमारे, आकाश वायदंडे, अक्षय आल्हाट, रमेश साळवे सामाजिक कार्यकर्त्यांनी या प्रकाराकडे लक्ष वेधून, “हे प्रशासनातील शिस्तभंगाचे व श्रमकायद्याचे उल्लंघन आहे” असे मत व्यक्त केले आहे. सफाई कामगारांची मूळ जबाबदारी म्हणजे परिसर स्वच्छ ठेवणे व स्वच्छता संबंधित काम करणे; मात्र त्यांच्याकडून क्लार्कची जबाबदारी देणे हे अन्यायकारक व गैरवर्तनाचे उदाहरण असल्याचे म्हटले जात आहे.
सदर प्रकरणाची चौकशी करून जबाबदार अधिकारी व कर्मचारी यांच्यावर कारवाई करण्यात यावी, अशी मागणी नागरिकांकडून करण्यात आली आहे. तसेच या प्रकारामुळे क्षेत्रीय कार्यालयातील कामकाजावर व नागरिकसेवेवर नकारात्मक परिणाम होत असल्याचेही स्थानिकांनी सांगितले.
या संदर्भात पुणे महानगरपालिका प्रशासनाने अद्याप अधिकृत प्रतिक्रिया दिलेली नाही. मात्र, कामगारांच्या हक्कांचे संरक्षण आणि पदनिहाय जबाबदारी राखणे हे प्रशासनाचे कर्तव्य असल्याने या घटनेची गंभीर दखल घेणे गरजेचे आहे.
संपादक : नागेश देडे
